RAFFAELLA SGUBIN
Sovrintendente Musei Provinciali di Gorizia
La val dal Judri, almancul de risultive sul Colvorat fin a Insic, e je unevore biele e interessant dal pont di viste naturalistic, storic, artistic e soredut economic. In cheste suaze il Paîs di Dolegne al pò sei a bon dirit considerât la "Perle" di chê zone di culinis cognussude in furlan cul non di Cuei e in sloven di Brda.
Un timp Dolegna, logade in bas te valade dongje il Judri, e jere dome un piçul paisut agricul pôc cognossût, ma in dì di vuê cu lis sôs frazions di Ruttars, Vencò, Lonzan, Scriò, Mernic e Restocine pe produzion di vins di cualitât e pal bon non dai ristorants e des sôs tratoriis el è doventât un centro economic e turistic impuartant.
Al è just parchest che si sedi pensât a meti adun chest "progjet" par fâ cognossi ancje lis bielecis dal paesaç, des "siet glesiis", de sô anime furlane leade al non di Pieri Zorut ma ancje de sô gastronomie di frontiere.
Ai autôrs di cheste guide al va il merit di vê condensât in tune cuindisine di cartelis in forme clare e sintetiche dut chel che i turiscj furlans, ma ancje slovens e austriacs e an plasê di savê su la storie, la culture, l'art sacre, la viticulture e l'ufiarte dal agriturisin e de ristorazion de zone.
Al è un struc di particolârs che nol è facil di cjatâ tai libris e che dome une ricercje paziente e ben curate e à mitût in lûs.
Dopo vê let chestis pagjnis, chei che deciradaran di passâ vacancis a contat cu la nature a cjataran in chescj lûcs no dome pietancis sauridis e vins gjenerôs ma ancje atrativis di caratar poetic e storic: a Lonzan a je la cjase là ch'al è nassût Pieri Zorut (1792-1867), considerât a lunc il plui grant poete furlan de nature, dal vin e dal amôr, a Truss e ancje a Ruttars si pò viodi chel che reste dai tancj cjscjei che te Ete di Mieç esistevin tal Cuei al centro di duris lotis, di violencis e di vendetis tra i Patriarcjs di Aquilee e i Conts di Gurize.
A van letis cun interes ancje lis pagjinis storichis dedicadis al paîs come "une tiare asburcjche inte Republiche di Vignesie" cun ducj i problems di cunfin che cheste situazion e compuartave. Al è di pensâ che ancje a Dolegne la dominazion asburgjche vedi lassât cualchi "segno".
Si trate duncje di une publicazion ben curade e di sigure utilitât.
